Archieven

361 Alsoo seecker questie ende verschil voorde edele Rade van Brabant in S'gravenhaege was opgestaan tusschen Peter Janssen Brock ter eenre ende Peeter Peeter Leunissen ter andere sijde over de successie maeckselen ende versterf van wijlen Barbara Lambert Sijmons weduwe Peter Leunisse ende moeder vande voirschreven Peeter Peter Leunissen ende van Marije sijns Peters sustere, moeder vande voirschreven Peter Janssen Brock. Soo sijn gecompareert Peeter Peter Leunissen voorgenoempde, naergelaten weduwer Emgarde sijne huijsvrouw dochter Jans van Dinther, met Peeter ende Jan sonen des voirschreven Peters bij de voirschreven Emgarde wettelijck verweckt. Hebben overgegeven aen de voirschreven Peteren Janssen Brock, o.a. een huijs, hoff metten gronde ende erffenisse daeraen ligende ende daertoe behorende, soo groot ende cleijn tselve gestaen ende gelegen is ter plaetse Eerschot, daerinne de voirschreven Peter Brock is wonende. Aldaer tusschen erffenisse Lambert Peter Anthonissen metten kijnder Peter Peter Anthonissen deen sijde ende Handrick Matheussen dander sijde, streckende vande gemeijne Valstraet totter gemeijne straete van Eerschot.