Willem Jan Willemss. alias Lenen out ontrent L [= 50] jaeren gedaight ende geeydt nae behoren ter instantien van Peter Joriss. Peterss. dat hem deponent kennelyck ende voer seker wel weet dat Joris Peter Maess. in verleden tyde heeft doen leggen eenen graeffve tusschen zynde erffenisse aende Kercke vanden gemeynen wech aene tot den Kerckhove toe, dat hy oock wel weet dat den Grave tusschen den erve dat nu toebehoort Jannen Aertss. van Helmont ende Gysbert Janss. vorster ende eertyts plach toe te behoren Jacob Ariens van Dijck byden vs. Joris Peterss. van syn selfs erff is geleeght ende dat alzoe den vs. Grave geheelyck is toebehorende den erffgenaemen Joris Peterss. vs. ende verclaert redenen synder welwetentheyt dat hy deponent wel eertyden dickmael totten vs. Joris Peterss. heeft geseeght dat hy vanden zelve grave soude laeten expedieren bescheet, om hem in tyden ende wijlen te dienen als hem tselve van noode zoude zyn
Jan Jan Willemss. alias Leenen out ontrent xlvi jaeren gedaeght ende geeydt ter instantien vs. soo recht is tuyght dat hy deponent eertijts geleden ontrent vyff oft ses en twyntich jaeren den vs. Grave tusschen der erffve Joris Peterss. ende Jacob Ariens nu toebehorende jannen Aertss. vs. ende Gysbert Janss. vorster heeft helpen graven ende wel voer seker weet, dat de Grave geleeghs is van Joris Peterss. erve ende Jorissen oft zynen erffgenamen toebehorende, verclaert redenen zynder wetentheyt dat Joris Peterss. eertijts Jacobben Ariens dede versuecken om mede te graven ende dat Jacob tselve weygerde, maer als tselve gegraven was, soe pooten Jacob Ariens op syn syde soe haest als Joris Peterss. dede.