'dat sy syn coemen opten CVI-sten dach novembris der maent lestleden anno XVC LXXVI omtrent tusschen elff ende twelff uren in den nacht in huyse heer Roeloff Willemss van der Haegen, pastoir tot Vechel. Ende doen heeft Jan Dirck Aert Smetss gesprocken: “Pastoer, heer, wy begeren dat ghy ter stont op wilt staen ende gaen met ons metten eerwerdigen heyligen sacrament ten huyse Jan Ariens by een craemvrowe.” Doen sprack heer Roeloff voirscreven: “Ick en sal desen avont nyet op staen Jan Dirck, all warden ghy ’t selver.” Doen sprack Hanrick Martens: “Heer, staedt vry op ende gaet met ons, wy syn wel een rot sterck.” Doen sprack heer Roeloff: “Ick en sal effen wel nyet op staen, all warder over vyff ende twyntich.” Doen spracken dese deponenten voirscreven: “Heer, ghy moet wel met ons gaen, off hair sal meer toe gedaen worden.” Doen sprack heer Roeloff: “Doet ow best, coempt morgen by my, ick sal ow bescheet laeten sien dat ick nyet doen en derff.”
Ende toen gingen dese voirscreven deponenten eewech ende gingen tot enen anderen priester, genoempt heer Jasper Jans van Tillair. Ende doen was heer Jasper voirscreven bereet ter stont met ons te gaen.
Dirck Herman Dircxs verklaart “dat Symon Jan Bartholomeussoon den selven deponent gesonden heeft om den pastoor van Vechel op enen sondach dat hy soude coemen ende brengen den heyligen oly, Jannen Meus des voirscreven Symons vader. Doen sprack die pastoer: “Ick in ben nu nyet ledich, coempt omtrent elff uren mit enen wagen, dan sal ick mede varen, want die man heeft wel sieck geweest jair ende dach, hy dal noch wel soe lange leven.” Ende doen was Jan Meus noch voor thien uren doot.'
Getuigen: Anthonis Hanrick Roeffs, Ariaen Aert Goertssen en Jan Willem Hanricxs van der Ryt, scepenen